အင်းယားမှာလမ်းလျှောက်ခြင်း
ဒီနေ့မနက်စောစောမှာ အင်းယားကိုလမ်းလျှောက်ထွက်ဖြစ်ပါတယ်။ အရင်ရက်တွေတုန်းက ဥာဥ့်နက်တဲ့အထိ
အင်တာနက်ကြည့်နေတော့ မနက်ဆိုရင် အိပ်ရာက နေမြင့်မှပဲနိုးလေ့ရှိပါတယ်။ ညတုန်းကတော့ မီးကလဲ အောက်
နေတော့အိပ်ရာစောစောဝင်ဖြစ်ပါတယ်။ မနက်ကျတော့အိပ်ရေးဝထားတော့လူက လန်းဆန်းနေပါတယ်။
ဒါနဲ့ အင်းယားကိုလည်းမရောက်တာကြာနေတာနဲ့ နံနက်စောစောဖီလင်ကိုလည်းခံစားချင်တာနဲ့ လမ်းသွားလျှောက်ပါတယ်။ ကန်ပေါင်ပေါ်ကိုရောက်တဲ့အခါ လမ်းလျှောက်နေသူ အတော်များများကိုတွေ့ရပါတယ်။
ကျွန်တော်လည်း ကန်ပေါင် ဟိုဘက်ထိပ်ကနေ ဒီဘက်ထိပ် နှစ်ခါပြန်လျှောက် အပြီးမှာ ခုံတခုံမှာ ထိုင်ပြီး နံနက်ခင်းရဲ့အလှကို အင်းယားရေပြင်ကြီးကိုကြည့်ရင် အေးအေးလူလူခံစားမိတာပေါ့။ အဲဒီအချိန်မှာ ကျွန်တော့်
ဘေးနား မလှမ်းမကမ်းက အားကစားဝတ်စုံဝတ်ထားတဲ့ အမကြီးတစ်ယောက်က ကန်စပ်ဆီကို ဆင်းနေတာကိုမြင်နေရပါတယ်။
ကျွန်တော်လည်း ထူးခြားတာနဲ့ ကြည့်နေရင်း အဲဒီ့ အမကြီးဟာ လက်ထဲက အထုပ်တထုပ်ကို ရေထဲကို လှမ်းပစ်
လိုက်တာကိုတွေ့ရပါတယ်။ တဆက်တည်းမှာပဲ "ဟဲ့ ဘာလုပ်နေတာတုန်း" ဆိုတဲ့ အသံနဲ့အတူ အဲဒီ့ အမကြီးရဲ့
မိတ်ဆွေ အမျိုးသမီး တစ်ယောက်ရဲ့အသံကိုလည်းကြားလိုက်ရပါတယ်။ အဲဒီ့နောက် ကျွန်တော်လည်း စိတ်ဝင်စားစွာနဲ့နားထောင်နေရာက အမှိုက်ပစ်တဲ့အမကြီးပြောလိုက်တာကတော့ ငါယတြာချေနေတာဟဲ့။
ဒီနေ့ဆို၆ရက်တောင်ရှိပြီ။ အားလုံး၈ရက်လုပ်ရမှာလို့ပြောနေသံကိုကြားလိုက်ရပါတယ်။ အဲဒီတော့မှ ကျွန်တော်
လည်း နံနက်ခင်းရဲ့လှပတဲ့နံနက်ခင်းကိုမခံစားနိုင်ပဲပြန်ခဲ့ပါတော့တယ်။
Subscribe to:
Post Comments (Atom)
No comments:
Post a Comment